Aşgabat we Yslamabat ikitaraplaýyn söwdany giňeltmek boýunça tagallalaryny işjeňleşdirýär. Türkmenistanyň ilçisi Atajan Möwlamow Pakistanyň söwda federal ministri Jam Kamal Han bilen Pakistanyň paýtagtynda geçiren duşuşygynda özara haryt dolanyşygynyň möçberini artdyrmagyň ýollaryny maslahatlaşdy diýip, ORIENT Pakistan media monitor neşirine salgylanyp habar berýär.
Duşuşykda iki ýurduň arasyndaky haryt dolanyşygynyň hereketini ýeňilleşdirjek üstaşyr söwda hakynda ylalaşygy tamamlamaga aýratyn üns berildi. Şeýle hem bar bolan ylalaşyklary, şol sanda Türkmenistanyň Söwda-senagat edarasy bilen Pakistanyň Söwdany ösdürmek boýunça müdirliginiň arasynda özara düşünişmek hakynda 2015-nji ýyldaky Ähtnamany täzelemek göz öňünde tutulýar.
Gepleşikleriň barşynda göni işewür gatnaşyklary berkitmek, ýük gatnaşyklaryny gowulandyrmak, söwda ýollaryny kämilleşdirmek we amallary ýönekeýleşdirmek üçin bilelikdäki işewürler geňeşini döretmek meseleleri maslahatlaşyldy.
Taraplar energetika, farmasewtika, oba hojalygy, dökünler we gurluşyk materiallary ulgamlarynda ulanylman galan köp sanly mümkinçilikleriň bardygyny nygtadylar.
