Russiýa Federasiýasynyň Başgyrdystan Respublikasynyň paýtagty Ufa şäherinde geçirilen GDA agza ýurtlaryň döredijilik we ylmy intelligensiýasynyň XVII forumynyň çäklerinde "Garaşsyz Döwletleriň Arkalaşygy: umumy gymmatlyklar we medeniýetleriň köpdürlüligi" ady bilen panelleýin diskussiýalar geçirildi. Çärä Türkmenistandan Medeniýet ministrliginiň Maddy däl medeni miras müdirliginiň ýolbaşçysy Jemile Gurbanowa wekilçilik etdi diýip, "Türkmenistan: Altyn asyr" elektron neşiri habar berýär.
Türkmenistanyň wekili başgyrt hem-de türkmen medeniýetiniň arasyndaky ýakyn baglanyşygy nygtap, milli geýimlerdäki we maddy däl mirasdaky umumy meňzeşlikleri belläp geçdi. Başgyrt zenanlarynyň dakynýan, şol bir wagtda hem türkmen zenanlarynda duşýan bilezikler anyk mysal hökmünde agzaldy.
Beýik türkmen şahyry Magtymguly Pyragynyň 300 ýyllygyna aýratyn üns berildi. Jemile Gurbanowa Foruma gatnaşyjylara Magtymguly Pyragynyň eserler ýygyndysyny we türkmen kompozitorlarynyň saz eserleriniň toplumyny sowgat berdi.
Diskussiýalaryň barşynda bu günki güne çenli başgyrt ýokary okuw mekdeplerinde Türkmenistandan 2400 talybyň bilim alýandygy nygtaldy.
