20-nji sentýabrda geçirilen giňişleýin Hökümet mejlisinde wise-premýer B.Orazdurdyýewa 2028-nji ýylda Amerikanyň Birleşen Ştatlarynyň Los-Anjeles şäherinde geçiriljek XXXIV Tomusky Olimpiýa we XVIII Tomusky Paralimpiýa oýunlaryna Türkmenistanyň milli ýygyndy toparlaryny taýýarlamak boýunça alnyp barylýan işler barada hasabat berdi. Bu barada “Watan” habarlar gepleşiginde aýdyldy.
Dünýä derejesindäki ýaryşlara ýurdumyzyň türgenlerini häzirden başlap taýýarlamak we olaryň ussatlygyny kämilleşdirmek, şeýle hem ýokary netijeleri gazanmaklary üçin zerur şertleri döretmek boýunça öňünde goýlan wezipelere laýyklykda Türkmenistanyň Bedenterbiýe we sport baradaky döwlet komiteti Guramaçylyk toparyny döretmegi, Aşgabat şäherindäki Olimpiýa şäherjiginiň desgalarynda we "Awaza" milli syýahatçylyk zolagyndaky sport toplumynda sportuň görnüşleri boýunça okuw-türgenleşik sapaklaryny hem-de ýygnanyşyklaryny guramagy teklip edýär.
Şunuň bilen baglylykda, döwlet Baştutanynyň garamagyna degişli teklip hödürlenildi.
Serdar Berdimuhamedow türgenlerimiziň 2028-nji ýylda geçiriljek Tomusky Olimpiýa we Paralimpiýa oýunlarynda üstünlikli çykyş etmegi üçin häzirden zerur işleri alyp barmagyň möhümdigine ünsi çekdi we bu ugurda taýýarlanylan teklibi goldap, wise-premýere degişli işleri geçirmegi tabşyrdy.
