Tbilisi şäheriniň Suhumi döwlet uniwersitetiniň Magtymguly Pyragynyň adyny göterýän okuw otagynda beýik türkmen şahyrynyň 300 ýyllygy mynasybetli "tegelek stol" duşuşygy geçirildi. Bu duşuşyk okuw otagy açylany bäri bu ýerde geçirilen ilkinji çäre boldy diýip, "Türkmenistan: Altyn asyr" elektron neşiri habar berýär.
"Tegelek stola" Türkmenistanyň we Gruziýanyň ylmy, medeni, syýasy we žurnalistika pudaklarynyň wekilleri gatnaşdy.
Duşuşygyň barşynda iki ýurduň arasynda medeni hem ynsanperwer gatnaşyklary berkitmekde bu okuw otagynyň açylmagynyň ähmiýeti bellenip geçildi. Çykyş edenleriň nygtamagyna görä, bu okuw otagy iki halkyň arasyndaky dostluk hem özara düşünişmek gatnaşyklaryny berkitmäge gönükdirilen bilelikdäki çäreleri geçirmek üçin möhüm meýdança bolar.
