9-njy sentýabrda Lebap welaýatynyň Türkmenabat şäheriniň ýöriteleşdirilen 32-nji orta mekdebinde Türkmenistanyň Bilim ministrliginiň Innowasiýalar-maglumat merkeziniň şahamçasy açyldy. Bu barada "Türkmenistan: Altyn asyr" elektron neşiri habar berýär.
Açylyş dabarasyna merkeziň ýolbaşçysy Ç.Hanmuhammedow, edaranyň işgärler düzümi, Baş bilim müdirliginiň wekilleri, şeýle hem ýerli mekdebiň mugallymlary we okuwçylary gatnaşdy.
Şahamçanyň açylmagynyň maksady - bilim bermegiň innowasion usullaryny ornaşdyrmak we bilim edaralarynyň hünärmenlerine häzirki zaman maglumat tehnologiýalaryny ulanmagy öwretmek. Çärede merkez tarapyndan işlenilip düzülen "E-mekdep" elektron platformasyna aýratyn üns berildi. Bu platforma okuw prosesi barada günüň dowamynda SMS ýa-da sanly habar beriş arkaly onlaýn görnüşde maglumat alyp durmaga mümkinçilik berýär.
Türkmenabatdaky şahamça şeýle hem bilim ulgamynyň işgärleriniň hünär başarnyklaryny giňeltmäge we dil hem-de kompýuter sowatlylygyny ýokarlandyrmaga mümkinçilik berer.
