12-nji sentýabrda Wengriýanyň Türkmenistanda täze bellenen Adatdan daşary we Doly ygtyýarly ilçisi Ýožef Roža Mejlisiň Başlygy D.Gulmanowa ynanç hatyny gowşurdy. Bu barada Türkmenistanyň Mejlisiniň metbugat gullugy habar berdi.
Ilçi diplomatik işini Daşkent şäherindäki (Özbegistan) rezidensiýasyndan alyp barar.
Duşuşygyň çäklerinde diplomat Türkmenistanyň durmuşa geçirýän oňyn daşary syýasy ugry bilen tanyşdyryldy. Şol syýasat parahatçylyk söýüjilik, giň halkara hyzmatdaşlyk ýörelgelerine esaslanýar. Bellenilişi ýaly, Türkmenistan Ýewropa Bileleşiginiň ýurtlary bilen netijeli gatnaşyklary ösdürýär. Bu bolsa ikitaraplaýyn hem köptaraplaýyn görnüşde, şol sanda iri halkara guramalaryň, hususan-da, BMG-niň çäklerinde türkmen-wenger hyzmatdaşlygynyň okgunly ösmegini şertlendirýär.
Mejlisiň Başlygy Türkmenistanyň Prezidentiniň durmuş ugurly döwlet syýasatynyň ileri tutulýan ugurlaryna ünsi çekdi.
Duşuşygyň ahyrynda ilçi Ýožef Roža döwletara gatnaşyklary mundan beýläk-de pugtalandyrmak üçin ähli tagallalary etjekdigine ynandyrdy.
Düýn ilçi Ýožef Roža şeýle hem Türkmenistanyň DIM-niň binasynda daşary işler ministriniň orunbasary Ahmet Gurbanow bilen duşuşyk geçirdi.
Söhbetdeşler syýasy-diplomatik, söwda-ykdysady, medeni-ynsanperwer ugurlarda ikitaraplaýyn gatnaşyklaryň mundan beýläk-de ösdürmek meselelerini ara alyp maslahatlaşdylar. Iki ýurduň arasyndaky däp bolan dostluk gatnaşyklaryny we özara bähbitli hyzmatdaşlygy ilerletmekde yzygiderli geçirilýän ýokary derejedäki duşuşyklaryň möhüm ähmiýeti bellenildi.
