Şotlandiýada piktler halkynyň syrly ýüzügi tapyldy. 1000 ýyldan gowrak ýaşy bolan bu artefakt Aberdin uniwersiteti tarapyndan geçirilen arheologiki gazuw-agtaryş işleri wagtynda Mori okrugynyň Burghed galasyndan (Burghead Fort) tapyldy diýip, Sky News habar berýär.
Burghed galasy - piktleriň esasy ilatly ýerlerinden biridir, ýöne onuň köp bölegi XIX asyrda bu ýerde şäher gurlanda weýran edilipdi.
Muňa garamazdan, arheologlar merkezi granat daşy ýa-da goýy gyzyl aýna bilen bezelen, batbörek görnüşinde ýasalan ýüzügi tapmagy başardylar. Bu tapyndyny höwesjeň arheolog Jon Ralf açdy we açyşyň özi üçin tolgundyryjy waka bolandygyny boýun aldy.
Bu ýüzük häzir Şotlandiýanyň Milli muzeýine derňew üçin iberildi, ol ýerde hünärmenler onuň takyk ýaşyny we maksadyny kesgitlemäge synanyşýarlar. Deslapky çaklamalara görä, ýüzük 1000-1500 ýaş aralygynda bolup biler.
Piktler biziň eýýamymyzyň III we XIX asyrlarynda Klaýd we Fort derýalarynyň aralygynda ýaşan, Şotlandiýanyň ýerli ilatydy. Bu halk hakda ýazmaça subutnamalar ýok diýen ýaly, onuň medeniýeti, durmuşy we däp-dessurlary baradaky maglumatlaryň köpüsi, şu ýüzük ýaly, seýrek arheologiki tapyndylara esaslanýar.