Paleontologlar Transilwaniýada ýerleşýän Haseg basseýninde (Rumyniýanyň demirgazyk-günbatar bölegi) ýaşy 72 million ýyllyk bolan dinozawrlaryň adaty däl baý mazarçylygyny tapdylar. Alymlar ululygy bäş inedördül metrden hem az meýdançada dinozawrlaryň 800-den gowrak süňküni, şol sanda birnäçe bölekleýin saklanyp galan skeletleri tapdylar.
PLOS ONE žurnalynda çap edilen barlagda aýdylmagyna görä, K2 kodly ady bolan meýdançada arheologlar şeýle-de amfibiýalaryň, pyşdyllaryň, krokodilleriň we süýdemdirijileriň galyndylaryna gabat geldiler.
Toparyň ýolbaşçysy Gabor Botfalwai: «2019-njy ýylda, Haseg basseýninde ilkinji gezek barlag işlerini geçirenimizde, K2 meýdançasyna gabat geldik. Bu möhüm pursatdy — derrew çaýyň hanasyndaky çal palçyk gatlaklarynda öwrülen, gaty gowy saklanyp galan onlap uly gara dinozawr süňklerini gördük» diýip gürrüň berdi.
Jynslaryň seljermesi 72 million ýyl mundan ozal tapyndynyň ýüze çykarylan ýerinde kiçeňräk subtropik kölüň bolandygyny we duýdansyz suw joşmalarynyň bu ýere yzygiderli ýagdaýda kenaryň ugrundaky delta gurşawyna ýygnanan haýwan läşlerini getirendigini görkezýär.
Makalanyň awtordaşy Soma Budaý belleýär: «Derýalaryň köle guýýan ýerinde akymyň bady haýallansoň, galyndylar ýygnanyp, bu ýerde aýratyn köp mukdarda süňk galypdyr».
Tapylan zatlaryň arasynda rabdodontidleriň we titanozawrlaryň bölekleýin skeletleri bar. Soňkylaryň tapylmagy aýratyn ähmiýetlidir: bu zauropodlaryň Transilwaniýada şeýle gowy saklanyp galan galyndylary ilkinji gezek tapylmagydyr.
