Gruziýada geçirilen arheologik barlaglar mundan 8000 ýyl ozal ýaşap geçen adamlar tarapyndan ekilen bugdaý yzlaryny ýüze çykardy. Bu tapyndy dünýäde çöreklik bugdaýyň gelip çykyşy baradaky ylmy garaýyşlara üýtgeşme girizýär.
Gazuw-agtaryş işlerini Gruziýanyň Milli muzeýiniň hünärmenleri Gadaçrili-Gora we Şulaweris-Gora diýen gadymy obalaryň ýerinde geçirdiler. Hysyrdyly işleriň barşynda gadymy samanly çig kerpijiň içindäki bugdaý sünbülleriniň we ösümlik galyndylarynyň yzlary anyklanyldy.
Bu ýerleriň taryhy mundan 8000–7300 ýyl ozal dowam eden Şulaweri–Şomutepe medeniýetine degişlidir. Şunlukda alymlar çöreklik bugdaý hut Günorta Kawkazda, ýagny Gruziýanyň çäklerinde medeni bugdaýyň ýabany ösümlik bilen tebigy usulda çaknyşmagy netijesinde döräpdir diýen netijä geldiler.
Muzeýiň müdiri Dawid Lordkipanidze: «Biz bu ýerde 8 müň ýyllyk bugdaýyň yzlaryny tapdyk. Birnäçe ýyl ozal bolsa, hut şu ýerlerde şonça ýyllyk çakyrçylygyň yzlaryny-da tapypdyk. Diýmek, Gruziýa çöregiň we çakyryň iň gadymy ojaklarynyň biridir» diýip, öňki barlaglaryň netijelerini hem mysal getirýär.
Paleoetnobotanik Nana Ruşiwili bilen Smitson institutynyň arheology Melinda Zeder hem edil şeýle pikirde. Olar öz gezeklerinde tapyndynyň Gruziýanyň bugdaýy ilkinji bolup eldekileşdiren merkezleriň biridigini subut edýändigini we munuň Günorta Kawkazyň ýerli ilatynyň oýlap tapyjylygynyň we zähmetiniň netijesidigini nygtaýarlar.
