Astrahan oblastynda 2-6-njy sentýabr aralygynda RF-nyň Günorta federal okrugynyň "BeregA" ýaşlar bilim forumy geçirildi. Forum Hazarýaka döwletlerinden, şol sanda Türkmenistandan, Eýrandan, Azerbaýjandan we Gazagystandan, şeýle hem Belarusdan we Özbegistandan ýaş liderleri jemledi diýip, "Türkmenistan: Altyn asyr" elektron neşiri habar berýär.
Türkmenistanyň wekiliýetine Magtymguly adyndaky Ýaşlar guramasynyň Balkan welaýaty boýunça Geňeşiniň başlygy Guwanç Çendirow ýolbaşçylyk etdi. Wekiliýetiň düzümine Magtymguly adyndaky Ýaşlar guramasynyň Merkezi Geňeşiniň, Türkmen döwlet binagärlik-gurluşyk institutynyň we Türkmen döwlet ykdysadyýet we dolandyryş institutynyň wekilleri girdi.
Forum ýaş liderlere tejribe alyşmaga, bilimlerini giňeltmäge we täze aragatnaşyklary ýola goýmaga mümkinçilik berýär. "BeregA" forumynyň esasy maksatlarynyň biri sebiti ýokary hünär taýýarlykly hünärmenler bilen üpjün etjek işgärler ätiýaçlygy bilen üpjün etmek bolup durýar.
