Gazagystan we Özbegistan bilelikdäki kosmos maksatnamasyny işe girizmäge taýýarlanýarlar. Iki ýurduň Sanly ministrlikleriniň başlyklary Şerzod Şermatow we Žaslan Madiýew taslamany ara alyp maslahatlaşmak üçin Astanada duşuşdylar.
Özbegistanyň Sanly tehnologiýalar ministrliginiň metbugat gullugynyň habaryna görä, gepleşikler sanly inklýuziýa we transformasiýa boýunça Aziýa-Ýuwaş umman konferensiýasynyň çäklerinde geçirildi.
Taraplar 2024-nji ýylyň ahyryna çenli emeli hemralary bilelikde uçurmak boýunça teklipleri taýýarlamak barada ylalaşdylar.
“Iki ýurduň gatnaşmagynda kosmosa emeli hemra toparyny bilelikde ibermekde hyzmatdaşlyk etmegiň meseleleri we ýylyň ahyryna çenli analitiki maglumatlary seljermegiň esasynda teklipleri işläp taýýarlamak ara alnyp maslahatlaşyldy” – diýip, Özbegistanyň Sanly tehnologiýalar ministrligi habar berdi.
Mundan başga-da, ministrler sanly başarnyklary ösdürmek we sanly innowasiýalary ornaşdyrmak boýunça sebitleýin hyzmatdaşlygyň geljegini ara alyp maslahatlaşdylar.
Gazagystanyň we Özbegistanyň Prezidentleri tarapyndan 2022-ni ýylyň maý aýynda kosmos giňişligini öwrenmek we parahatçylykly maksatlar üçin ulanmak boýunça hyzmatdaşlyk barada şertnama gol çekildi. Bu taslama kosmos pudagynda ikitaraplaýyn hyzmatdaşlygy ösdürmegiň täze tapgyry bolar.
