Kaliforniýa tehnologiýa uniwersitetiniň alymlary adamyň alýan demi arkaly dürli keselleri ýüze çykaryp bilýän “akylly” örtük döretdiler. Adaty bolmadyk esbabyň synagynyň netijeleri Science žurnalynda çap edildi.
Örtük, laboratoriýa synaglaryny talap etmezden, goýberilýän demdäki himiki maddalara gözegçilik edýän EBCare enjamy bilen enjamlaşdyrylandyr. Ol alkogolyň, ammiagyň, nitritiň we pH-iň derejelerini kesgitläp biler.
Maglumatlar Bluetooth arkaly goýberilýän demiň biomarkerlerini seljerýän ykjam programma iberilýär. Bu demgysma, dem alyş ýollarynyň sowuklamasy we böwrek näsazlyklary ýaly keselleri anyklamaga mümkinçilik berýär.
Örtük günüň dowamynda yzygiderli ulanylyp, saglyga yzygiderli gözegçilik edip biler.
“Näsagyň dem alşynyň monitoringi - bu adatça, demgysma we dem alyş ýollarynyň beýleki kesellerine baha bermek üçin edilýär. Mundan ozal hassalar nusgalary bermek üçin hassahana baryp, laboratoriýanyň netijelerine garaşmaly bolýardylar"-diýip, barlagyň awtorlarynyň biri Weý Gao belleýär.
Işläp düzüjiler enjamyň elýeterlidigini nygtaýarlar. Örtügiň köp gezek ulanylýan böleginiň bahasy onlarça dollar, bir gezek ulanylýan bölekleri bolsa 1 dollar töweregi bolar.
Nottingem uniwersitetiniň professory Ien Holl bu örtük kliniki synaglarda, esasanam, täze dermanlary işläp taýýarlamagyň başlangyç döwründe peýdaly bolar diýip hasaplaýar.
