2-nji sentýabrda «Rönesans Holding» kompaniýasynyň müdiriýetiniň başlygy Erman Ylyjak kompaniýa ynanylan taslamalary durmuşa geçirmegiň barşy barada Türkmenistanyň Halk Maslahatynyň Başlygy Gurbanguly Berdimuhamedowa hasabat berdi. Bu barada “Watan” habarlar gepleşiginde habar berildi.
Türkmenistanyň Halk Maslahatynyň Başlygy türkmen tarapynyň “Rönesans Holding” kompaniýasynyň işine ýokary baha berýändigini, toplanan baý tejribäni hasaba almak bilen, geljekde-de hyzmatdaşlygy giňeltmäge we anyk tekliplere garamaga taýýardygyny aýtdy.
Işewür bildirilen uly ynam üçin sagbolsun aýdyp, ýolbaşçylyk edýän kompaniýasynyň öz üstüne alan şertnamalaýyn borçnamalaryny abraý bilen ýerine ýetirmegi üçin ähli tagallalary etjekdigine ynandyrdy.
Şeýle hem duşuşygyň dowamynda şu ýylyň 10-11-nji sentýabrynda Aşgabatda geçiriljek Türkmenistanyň maýa goýum forumynyň ähmiýetine üns çekildi.
Soňra “Rönesans Holding” türk kompaniýasynyň ýolbaşçysy Aşgabatda täze, häzirki zaman söwda merkeziniň binalar toplumyny gurmak babatda kompaniýa tarapyndan işlenip taýýarlanylan taslamalary görkezdi. Bellenilişi ýaly, “Rönesans Holding” kompaniýasynyň hünärmenleri täze söwda merkeziniň gurluşygy we ony enjamlaşdyrmak baradaky degişli maglumatlary taýýarladylar.
Gurbanguly Berdimuhamedow görkezilen taslamalar bilen içgin tanşyp, meýilleşdirilen taslamalar durmuşa geçirilende, ýerli tebigy aýratynlyklaryň nazarda tutulmagynyň, ekologik kadalaryň we halkara ölçegleriň berk berjaý edilmeginiň zerurdygyny belledi hem-de taslama düzüjilere, gurluşykçylara bu babatda anyk görkezmeleri berdi.
