Huawei kompaniýasy organizmiň 60-dan gowrak parametrini ölçemäge ukyply bolan Huawei TruSense saglyga gözegçilik ulgamyny hödürledi. Täze tehnologiýa diňe bir fiziki aýratynlyklary däl, eýsem ulanyjynyň emosional ýagdaýyny-da yzarlaýar diýip, Office Life neşiri habar berýär.
TruSense organizmiň alty esasy ulgamynyň ýagdaýyny seljerýär: ýürek-damar, dem alyş, hereketlendiriji, newrologik, endokrin we reproduktiw. Akylly sagatlar ýaly dakylýan gurluşlardaky datçikler pulsa we wegetatiw nerw ulgamynyň işine gözegçilik edip, ulanyja saglygy barada jikme-jik maglumat berýär.
Huawei kompaniýasynyň dakylýan gurluşlar we saglyga gözegçilik tehnologiýalary departamentiniň prezidenti Riko Çžan täze gurluşy sanly saglygy goraýyş pudagynda öňegidişlik diýip atlandyrdy. Kompaniýa TruSense-iň adamlara sagdyn durmuş ýörelgesini alyp barmaga, näsazlyklary irki tapgyrda ýüze çykarmaga we saglygy barada esasly çözgütleri kabul etmäge kömek etjekdigini belledi.
Dakylýan gurluşlar ugrunda 11 ýyldan gowrak tejribesi bolan Huawei eýýäm 150 milliondan gowrak gurluş bilen üpjün etdi, onuň saglyk üçin programmalarynyň bolsa 520 milliondan gowrak ulanyjysy bar. Häzirki wagtda kompaniýa TruSense-i mümkin boldugyndan takyk we hemmeler üçin elýeterli eder ýaly adamlaryň deri reňkindäki, bilek ýogynlygyndaky we bedeniň temperaturasynyň üýtgemegindäki tapawutlar bilen bagly meseleleri çözmegiň üstünde işleýär.
