26-njy awgustda Samarkantda Merkezi Aziýanyň iri festiwallarynyň biri bolan «Şark taronalari» («Gündogaryň mukamlary») atly XIII Halkara festiwaly açyldy. ÝUNESKO-nyň howandarlygynda geçýän festiwala dünýäniň 70-den gowrak ýurtlaryndan ussatlar gatnaşýar diýip, "Türkmenistan: Altyn asyr" elektron neşiri habar berýär.
Açylyş dabarasyna ÝUNESKO-dan, TÜRKSOÝ-dan, Türki medeniýeti we mirasy gaznasyndan, Garaşsyz Döwletleriň Arkalaşygyndan hem-de beýleki guramalardan hormatly myhmanlar gatnaşdylar.
Prezident Şawkat Mirziýoýew myhmanlary mübärekläp, «Şark taronalari» festiwalynyň dünýä mukamlarynyň hakyky nyşanyna öwrülendigini belledi. Şunuň bilen baglylykda, Festiwalyň dostlarynyň halkara klubuny döretmek başlangyjy beýan edildi.
Festiwalda Türkmenistana M.Kulyýewa adyndaky Türkmen milli konserwatoriýasynyň mugallymlary Saparmyrat Amanmyradow (gyjak), Türkmenistanyň at gazanan artisti, halk saz gurallary orkestriniň ýolbaşçysy Omar Igamow hem-de TMK-nyň 4-nji ýyl talyby Allamyrat Muhammetgulyýew (gargy tüýdük) wekilçilik etdiler.
Saz forumynyň baý maksatnamasy artistleriň Samarkandyň dürli meýdançalarynda çykyş etmeklerini hem-de «Gündogar halklarynyň saz medeniýeti: ählumumylaşma işlerinde döredijilik taýdan ýakynlaşmagyň ýörelgeleri» atly maslahatyň geçirilmegini özünde jemleýär.
Mundan başga-da, iki ugry: halk aýdym-sazlarynyň hünär (nusgawy) ugruny, şeýle hem häzirki zaman kompozitorlarynyň döredijiligine esaslanan aýdym-saz ugruny gurşap alýan bäsleşik guraldy.
Festiwal 30-njy awgustda tamamlanar
