BMG-niň Çagalar gaznasynyň (ÝUNISEF) Türkmenistandaky wekilhanasy Aşgabatda "Garagum" myhmanhanasynyň ýanyndaky meýdançada 19-njy awgustda badalga alan Kids Expo sergisine gatnaşýar. Türkmenistanda ilkinji gezek geçirilýän bu görnüşdäki sergi ÝUNISEF-e çagalar we olaryň ene-atalary bilen interaktiw ýagdaýda özara gatnaşyk etmäge mümkinçilik berýär diýlip, guramanyň saýtynda aýdylýar.
Serginiň birinji gününde dürli görnüşli oýunlar, bilim programmalary we maglumat beriş çäreleri guraldy. ÝUNISEF-iň diwarlygyna baryp görenler gyzykly çärelere gatnaşmaga mümkinçilik aldylar.
«ÝUNISEF-de biz çagalar bilen bagly bolan ähli zadyň bir bölegi bolmaga uly ymtylyş bilen gatnaşýarys. Kids Expo bize maşgalalar bilen gatnaşyk etmäge, maglumat alyşmaga we Türkmenistandaky çagalar üçin täze hyzmtdaşlyklary ýola goýmaga oňat mümkinçilik berýär - diýip, ÝUNISEF-iň Türkmenistandaky wekiliniň orunbasary Aleksandr Nartea belleýär.
«Biziň bilen bilelikde oýnamaga, öwrenmäge we şatlanmaga geliň. Biz her bir çaga üçin ýagty geljegiň ugrunda iş alyp barýarys!" diýip, guramanyň saýtynda aýdylýar.
«Kids Expo: Ähli zat çagalar üçin» sergi-ýarmarkasy 22-nji awgusta çenli dowam eder.
