Waterloo uniwersitetiniň we Szýannan uniwersitetiniň barlagçylary bedeniň ýylylygyny we Gün energiýasyny elektrik toguna öwrüp bilýän mata döretdiler. Material MXene-den hem-de ýokary geçirijilige we çeýelige eýe bolan geçiriji polimerlerden durýar. Ony saglyk we işjeňlik görkezijilerini jemlemek üçin ulanyp bolar.
Mata neýlona esaslanýar, onuň ýüzüne wodorod baglanyşyklary arkaly MXene bölejiklerini özüne çekýän polidopaminiň (PDA) şepbeşik gatlagy çalyndy. Bu elastik termoelektrik gurluşyň emele gelmegine sebäp boldy.
Yzygiderli zarýad berilmegini talap edýän adaty geýilýän enjamlardan tapawutlylykda, täze mata batareýa gerek däl. Geçirilen synaglar onuň, bazardaky bar bolan analoglar bilen deňeşdirilende, gaty durnukly, çydamly we tygşytlydygyny görkezdi.
Inženerler temperatura, basyşa, himiki düzümine we beýleki parametrlere gözegçilik etmek üçin, materiala dürli datçikleri birleşdirmegi göz öňünde tutýarlar. Beýleki zatlar bilen birlikde, temperaturany we dem alyş tizligini yzarlap bilýän, şeýle hem demdäki himiki maddalary ýüze çykarmak bilen wiruslary, öýken rakyny we beýleki keselleri kesgitlemäge kömek edip biljek akylly ýüz örtüklerini döretmek teklip edilýär.
