Günde soňky 20 ýylda rekord möçberde Gün tegmilleri hasaba alyndy. NASA-nyň Gün dinamikasy obserwatoriýasynyň (SDO) 2024-nji ýylyň 8-nji awgustynda düşüren suratlarynda hünärmenler 337 sany aýry-aýry tegmili hasapladylar. Günde tegmilleriň şeýle möçberi 2001-nji ýylyň mart aýyndan bäri ýüze çykarylmandy.
Maglumatlar heniz gutarnykly däl, ýöne Kosmos howasyny çaklamak merkeziniň (SWPC) hünärmenleri Gün işjeňliginiň 25-nji döwrüniň çak edilenden has işjeňdigni nygtaýarlar.
Öň, bu döwrüň iň ýokary derejesiniň 2024-nji ýylyň ýanwar – oktýabr aýlaryna gabat geljekdigi çaklanypdy.
Günüň şeýle işjeňligi ajaýyp polýar şöhlelenmeleriniň döremegine getirip, hemralaryň işini bozup we howa duýgur adamlaryň ýagdaýyna täsir edip bilýän geomagnit hadysalaryny ýüze çykarýar.
SWPC Gün tegmilleriniň sany bilen bagly gutarnykly maglumatlary aýyň ahyrynda hödürlär. Şol bir wagtyň özünde, Gün tegmilleriniň indeksi we uzak möhletleýin Gün gözegçilikleri boýunça Bütindünýä maglumatlar merkezi (WDC-SILSO) we Belgiýadaky Patyşalyk obserwatoriýasynyň Günüň täsiri boýunça maglumatlar merkezi (SIDC) häzirki wagtda tegmilleriň sanyny 299 diýip çaklaýar, bu bolsa 2002-nji ýylyň iýul aýyndan bäri iň ýokary görkezijidir.
