2024-nji ýyl bütin dünýäde hasaba alnan iň ýokary temperatura derejeleriniň sany boýunça rekordly boldy. Britaniýanyň “The Guardian” gazetiniň maglumatlaryna görä, dünýäniň 15 ýurdunda rekord derejede ýokary howa temperaturalary hasaba alyndy, şeýle-de dürli ýurtlarda aýlar boýunça 130 ýylylyk rekordy täzelendi.
Klimatolog Maksimiliano Errera 2024-nji ýylda adatdan daşary ýylylyk hadysalarynyň sanynyň öň hasaba alnan görkezijilerden geçýändigini belleýär. Hususan-da, Meksikada temperatura Selsiý boýunça 52 gradusa, Müsürde 50,9 gradusa, Malide bolsa 48,5 gradusa ýetdi.
Bilermen adatdan daşary yssy howanyň adamyň işiniň netijesinde ýüze çykan global ýylama, şeýle-de El-Ninýo tebigy hadysasynyň täsiri bilen baglanyşyklydygyny belläp geçýär. El-Ninýonyň gowşamagyna garamazdan, 2024-nji ýylda temperatura rekordlarynyň sany azalman, tersine, köpeldi.
