12-nji awgustda Türkmenistanyň Prezidenti Serdar Berdimuhamedowyň atasy, Gurbanguly Berdimuhamedowyň kyblasy, içeri işler edaralarynyň hormatly weterany Mälikguly Berdimuhamedowyň nusgalyk ömrüne bagyşlanan çäreler geçirildi. Bu barada "Türkmenistan" gazetinde habar berildi.
Türkmenistanyň Içeri işler ministrliginiň Mälikguly Berdimuhamedow adyndaky 1001-nji harby bölüminiň Medeniýet öýünde «Dowamat-dowamly mertdir pederim» atly dabaraly maslahat geçirildi.
Şeýle hem bu ýerde Mälikguly Berdimuhamedowyň gulluk ýyllarynda dolandyran moto we awtoulaglaryň sergisi guraldy.
Soňra dabara Aşgabadyň «Çoganly» ýaşaýyş toplumyndaky Mälikguly Berdimuhamedow adyndaky ýaşaýyş jaý toplumynda dowam etdi. Bu ýere ýygnananlar ýaşaýyş jaý toplumynyň dolandyryş binasynda ýerleşýän Mälikguly Berdimuhamedowyň diwar heýkeline tagzym etdiler.
Dolandyryş binasynda Mälikguly aganyň özboluşly muzeýi hem ýerleşýär. Onda arhiw materiallary, dürli resminamalaryň, şahadatnamalaryň, şol sanda harby atlar baradaky şahadatnamalaryň nusgalary, döwlet sylaglary, suratlar jemlenendir.
