Dünýäniň iň uly transport merkezleriniň biri bolan Dubaýyň Halkara howa menzili 2024-nji ýylyň birinji ýarymynda rekord ýolagçy akymyny hasaba aldy. Ýanwar – iýun aýlarynda howa menzili 44,9 mln ýolagça hyzmat etdi, bu geçen ýylyň degişli döwri bilen deňeşdirilende 8% köpdür diýip, Dubai Airports kompaniýasynyň metbugat relizine salgylanyp, TASS habar berýär.
Ýolagçylaryň köpüsi Hindistandan (6,1 mln), Saud Arabystanyndan (3,7 mln) we Beýik Britaniýadan (2,9 mln) geldi.
Hasabat döwründe howa menzili 216 müň gatnaw kabul etdi, bu 2023-nji ýylyň birinji ýarymyndakydan 7,2% köpdür. Iň netijeli aý 7,9 mln ýolagçy bilen ýanwar boldy.
Dubai Airports-yň baş müdiri Pol Griffits howa menziliniň 2024-nji ýylda 91,8 mln ýolagçyny kabul etmäge taýýarlanýandygyny aýtdy.
“Biz täze rekordlara tarap barýarys we 2024-nji ýylda 91,8 mln myhmany kabul etmegi meýilleşdirýäris” – diýip, ol aýtdy.
Ýatlap geçsek, 2023-nji ýylda howa menziliniň ýolagçy akymy 86,9 mln adama ýetdi. COVID-19 pandemiýasyndan öň rekord görkeziji 2018-nji ýylda boldy – 89,1 mln ýolagçy.
