NASA agentligi NEOWISE kosmos enjamynyň missiýasyny tamamlady, ol 10 ýyldan gowrak wagt öndümli işden soň 8-nji awgustda öçürildi.
NEOWISE asteroidleri we kometalary, şol sanda howply bolup biljek obýektleri gözlemek üçin döredildi. Işlän döwründe enjam Gün ulgamynyň 44 müňden gowrak obýektiniň 1,45 mln infragyzyl ölçegini öz içine alýan tutuş asmanyň kartalaryny döretdi. Ýüze çykarylan Ýere golaý 3000-den gowrak obýektiň 215-isi ilkinji gezek hut NEOWISE tarapyndan tapyldy. Şeýle-de, missiýa 25 sany täze kometany, şol sanda 2020-nji ýylyň tomsunda gijeki asmandan geçip giden belli C/2020 F3 NEOWISE kometasyny ýüze çykardy.
Missiýany tamamlamak çözgüdi NEOWISE-yň ýakyn wagtda peýdaly ylmy maglumatlary bermek üçin öz orbitasynda has pese düşjekdigi bilen baglanyşyklydyr. Enjam 2024-nji ýylyň ahyryna çenli Ýeriň atmosferasynda ýanar. 2009-njy ýylda WISE hökmünde başlanan bu missiýa 2013-nji ýylda NEOWISE bolup, planetar goragynda möhüm rol oýnady.
NEOWISE Ýere golaý obýektleri anyklamak üçin uçurylyşy 2027-nji ýyla meýilleşdirilýän NASA-nyň ilkinji infragyzyl teleskopy NEO Surveyor-y işläp düzmek ýaly möhüm ylmy mirasy galdyrdy.
