South China Morning Post-yň habar bermegine görä, Hytaýyň Adam resurslary we sosial üpjünçilik ministrligi täze 19 hünäriň ykrar edilendigini habar berdi. Täze hünärleriň aglabasy sanly ykdysadyýet we innowasiýa pudaklary bilen baglanyşykly bolup, munuň özi bu pudaklaryň çalt ösýändigini görkezýär.
Täze hünärleri tassyklamak işi geçen ýylyň ahyrynda başlandy, ýöne gutarnykly sanaw diňe 31-nji iýulda çap edildi. Täze hünärleriň içinde onlaýn-strimer, akylly awtoulagy synag edýän sürüji, emeli aň programmalary boýunça hünärmen we bioinženerçilik boýunça tehnik bar.
Ministrlik täze hünärleriň döredilmeginiň iş ýerleriniň, hünär biliminiň we okuwyň ösmegine täsirini ýetirýändigini aýtdy. Şeýle hem, bu zähmet standartlarynyň derejesini ýokarlandyryp, iş bilen üpjünçiligi we telekeçiligi ösdürip biler.
Sinhua döwlet habarlar gullugy täze hünärleriň ykrar edilmegi işçilerde ynamy artdyrýandygyny we milli syýasatdan peýdalanmaga mümkinçilik berýändigini sözüň üstüne goşdy. Hususan-da, Hytaýda zähmet bazaryna ep-esli täsirini ýetirýän onlaýn-strimeriň hünäri aýratyn tapawutlanýar.
