Walt Disney korporasiýasynyň Disney+ we Hulu platformalaryny öz içine alýan striming bölümi taryhynda ilkinji gezek çärýegi girdeji bilen tamamlady. Bu barada baş kompaniýanyň hasabatynda habar berilýär.
Iýun aýynda tamamlanan üçünji çärýegiň jemi boýunça, striming bölümi 47 mln dollar operasion girdeji aldy. Bir ýyl ozal Disney+ we Hulu 512 mln dollar möçberde ýitgi çekipdi.
Hasabat döwründe tutuş Walt Disney-iň arassa girdejisi bir ýyl ozalky 460 mln dollar ýitgi bilen deňeşdirilende, 2,6 mlrd dollar boldy.
Bu döwürde Disney Plus platformasy ABŞ-da we Kanadada 1 milliona golaý täze abunaçy hem jemläp, olaryň umumy sanyny 54,8 milliona ýetirdi. Hulu platformasyna ýazylanlaryň sany bolsa çärýekde 50,2 milliondan 51,1 milliona ýetdi.
Baş kompaniýa striming bölümi üçin dördünji çärýegiň hem girdejili boljakdygyny çaklaýar. Adatça, ol köp maýadarlaryň ünsüni özüne çekýär – soňky birnäçe ýylda Disney we onuň hyzmatdaşlary Disney+ bilen Hulu platformalaryna birnäçe milliard dollar maýa goýdular.
