1-nji awgustda Türkmenistanyň Ylymlar akademiýasynyň Dil, edebiýat we milli golýazmalar institutynda Saud Arabystany Patyşalygynyň Patyşa Abdul Aziz adyndaky Ylmy merkeziniň Ýerine ýetiriji başlygy Turki Al-Şuwaýyryň ýolbaşçylygyndaky wekiliýet bilen duşuşyk geçirildi diýip, "Türkmenistan: Altyn asyr" elektron neşiri habar berýär.
Duşuşygyň barşynda ikitaraplaýyn ylmy hyzmatdaşlygyň gazanylanlaryny we geljegini, şol sanda Magtymguly Pyragynyň 300 ýyllyk ýubileýi bilen bagly çäreleri maslahatlaşdylar. Er-Riýadda Magtymgulynyň eserleriniň arap dilindäki neşiriniň tanyşdyrylyşyny geçirmek meýilleşdirilýär.
Wekiliýetiň ýurdumyza saparynyň çäklerinde myhmanlar şeýle hem «Köne Nusaý» döwlet taryhy-medeni goraghanasyna, Türkmenistanyň Döwlet medeniýet merkeziniň Döwlet muzeýine, Türkmenistanyň Döwlet medeniýet merkeziniň Döwlet kitaphanasyna baryp gördüler.
