Tesla kompaniýasy awtoulagyň hereket wagtynda kapotynyň öz-özünden açylyp bilmek howpy zerarly ABŞ-da 1,85 million elektromobilini yzyna çagyrýar. Bu kemçilik sürüjini ýapylmadyk kapot baradaky signaldan mahrum edýän gulpuň mikrogeçirijileriniň deformasiýasy bilen baglanyşyklydyr. Kapotyň ýolda açylyp, sürüjiniň öňüni ýapmagy, netijede bolsa dürli ýol heläkçiliklerine sebäp bolmagy mümkin diýip, Bloomberg habar berýär.
Milli ýol hereketi howpsuzlygy gullugynyň (NHTSA) hasabatyna görä, bu kemçilik 2020-nji ýylyň ýanwar aýyndan häzirki wagta çenli satylan Tesla Model 3, Model Y, Model X we Model S awtoulaglarynda bardyr.
Näsazlygy aradan aýyrmak üçin Tesla 18-nji iýunda hyzmat merkezine barmagy talap etmeýän bortdaky programma üpjünçiligini uzakdan täzeläp başlady.
Kompaniýa ýolda kapotyň açylmagy bilen baglanyşykly wakalaryň esasan Hytaýda hasaba alnandygyny we ABŞ-da diňe üç hadysanyň bardygyny aýdýar. Yzyna çagyrylan elektromobilleriň diňe 1%-ine bu kemçiligiň täsir edendigi çaklanýar.
