Türkmenistanyň zehinli sazandalaryndan ybarat bolan ýaşlar kamera orkestri 25 — 28-nji iýulda Awstriýa Respublikasynyň paýtagty Wena şäherinde geçirilen X Bütindünýä orkestr festiwalyna gatnaşdylar. Bäsleşige ilkinji gezek gatnaşýan türkmen sazandalary «Kamera orkestri» ugry boýunça «Altyn baýraga» mynasyp boldular. Bu barada "Türkmenistan" gazetinde habar berilýär.
2013-nji ýylda Wena şäherinde esaslandyrylan Bütindünýä orkestr festiwalyna Türkmenistan bilen bir hatarda, Awstriýa, Fransiýa, Ispaniýa, Niderlandlar, Horwatiýa, Hytaý ýaly ýurtlardan jemi 17 orkestr gatnaşdy.
Ýurdumyzyň ýaşlar kamera orkestri zehinli dirižýor Resul Gylyjowyň ýolbaşçylygynda Wena şäheriniň naýbaşy konsert zallarynyň sahnalarynda daşary ýurt nusgawy eserlerini ussatlarça ýerine ýetirip hem-de türkmen dutarynda täsirli çykyş edip, festiwala gatnaşyjylaryň we tomaşaçylaryň gyzgyn söýgüsine mynasyp boldy. Medeni çäräniň barşynda dünýäde iň uly we abraýly Wena konserwatoriýasynda bu festiwalyň döredijilik komitetiniň prezidenti, britan dirižýory, professor Tobi Pýorser türkmen sazandalary bilen ussatlyk sapagyny geçdi.
Festiwalyň çäklerinde orkestrleriň arasynda guralan bäsleşik hem örän çekeleşikli geçdi.
Bütindünýä orkestr festiwalynyň ýapylyş dabarasy «Altyn zal» ady bilen tanalýan, dünýäniň iň meşhur konsert zallarynyň biri bolan Wena filarmoniýasynda («Muzikferaýn») geçirildi. Bu ýerde hem tomaşaçylar türkmen sazandalaryny joşgunly goldap, olaryň çykyşlaryny el çarpyşmalar bilen garşyladylar.
Konsertiň ahyrynda festiwalyň çäklerinde geçirilen bäsleşigiň netijeleri yglan edildi. Emin agzalarynyň biragyzdan iň ýokary, ýagny 40 bal bermegi bilen, türkmen sazandalary «Kamera orkestri» ugry boýunça «Altyn baýraga» mynasyp boldular. Festiwalyň döredijilik komitetiniň prezidenti, britan dirižýory, professor Tobi Pýorser türkmen sazandalarynyň çykyşyna ýokary baha berip, bu orkestr bilen bilelikde konsertleri guramagy, mümkinçilik dörän halatynda, Türkmenistana gelmegi meýilleşdirýändigini hem-de indiki ýylda geçiriljek Bütindünýä orkestr festiwalyna gatnaşmak üçin Türkmenistana çakylyk iberiljekdigini nygtady.
