Türkmenistanly türgenler Parižde Olimpiada — 2024-iň açylyş dabarasyna gatnaşdylar

  • 27.07.2024 09:10
  • 16k+

26-njy iýulda Fransiýanyň paýtagtynda XXXIII tomusky Olimpiýa oýunlarynyň açylyş dabarasy boldy. Oňa Türkmenistanyň türgenleri hem gatnaşdylar. 1896-njy ýylda fransuz jemgyýetçilik işgäri Pýer de Kuberten tarapyndan gaýtadan dikeldilen we her dört ýyldan bir gezek geçirilýän bu iri ýaryşlar Ýer ýüzüniň dürli künjeginden sport dünýäsiniň iň ezber wekillerini bir ýere jemleýär.

Türkmenistanyň Olimpiýa wekiliýetiniň düzümine 19 adam, şol sanda sportuň dört görnüşi — dzýudo, agyr atletika, suwda ýüzmek, ýeňil atletika boýunça çykyş edýän 6 türgen girýär.
Tomusky Olimpiýa oýunlarynyň taryhynda açylyş dabarasy ilkinji gezek stadionda däl-de, şäheriň merkezinde geçirildi. Dabara türgenleriň adaty bolmadyk ýörişi bilen başlandy: Olimpiýa oýunlaryna gatnaşyjylar Sena derýasynda gaýyklarda ýüzdüler. Wekiliýetleriň ýörişi Austerlis köprüsinde başlandy we olar gaýyklarda 6 kilometrlik ýoly geçip, Eýfel diňiniň öňündäki “Trokadero” meýdançasyna geldiler. Syýahatyň dowamynda türgenler Fransiýanyň paýtagtynyň gözel künjekleri: Notr-Dam, Luwr, Uly köşk, Pon-Nýof köprüsi we beýleki desgalar bilen tanyşmaga mümkinçilik aldylar.

Däbe görä, türgenleriň dabaraly ýörişini Olimpiýa oýunlarynyň watany bolan Gresiýanyň ýygyndy topary açdy. Pariž şäherinde geçirilýän Olimpiada gatnaşýan toparlaryň ählisi kenaryň ýakasynda gurnalan münberlere ýygnanan köp sanly tomaşaçylaryň öňünden geçdiler. Şolaryň arasynda Türkmenistanyň milli ýygyndysy hem bar. Toparyň baýdak göterijisi, dzýudo boýunça “Uly tuwulga” ýaryşynyň ýurdumyzyň taryhyndaky ilkinji çempiony S.Rahimow türkmen türgenleriniň hatarynyň öňüni çekdi. Ol şu ýylyň maýynda Täjigistanda geçirilen «Dushanbe Grand Slam — 2024» ýaryşynda 66 kilograma çenli agram derejesinde altyn medala mynasyp boldy. Indi bolsa oňa dört ýyldan bir gezek geçirilýän esasy sport ýaryşynda ýurdumyzyň milli ýygyndy toparynyň baýdak göterijisi bolmak ýaly jogapkärli wezipe ynanyldy.
Olimpiada — 2024-de Türkmenistana S.Rahimow bilen bir hatarda, dzýudoçy M.Pardaýewa (57 kilograma çenli), ýüzüjiler M.Žalaýew (100 metr aralyga erkin usulda), A.Primowa (100 metr aralyga arkanlygyna ýüzmek), agyr atletikaçy D.Hasanbaýew (102 kilograma çenli) we ýeňil atletikaçy W.Meredowa (100 metr aralyga ylgamak) wekilçilik edýärler. W.Meredowa türkmen wekiliýetiniň düzüminde Olimpiýa oýunlaryna ikinji gezek gatnaşýan ýeke-täk türgen bolup, ol ilkinji gezek 2008-nji ýylda Hytaýyň paýtagty Pekinde geçirilen Olimpiadada çykyş edipdi. Beýleki türgenler Olimpiýa oýunlarynda ilkinji gezek çykyş ederler.
Türkmenistanyň ýygyndy toparynyň Pariždäki metbugat wekilleriniň habar berşi ýaly, türgenlerimiz ruhubelent we bäsleşige taýýar. Uzak aralyga garamazdan, olar watandaşlarynyň goldawyny duýýarlar.


26.07.2025 17:04
4.5k+

Aşgabatdaky Kikboks we Boks zaly çagalar hem ýetginjekler üçin türgenleşikleri guraýar

Aşgabatda Olimpiýa şäherçesinde ýerleşýän Kikboks we Boks zaly 6 ýaşdan 18 ýaşa çenli çagalary hem ýetginjekleri sportuň kikboks we boks görnüşleri boýunça türgenleşiklere ýazylmaga çagyrýar. Sportuň bu görnüşleri boýunça ussat tälimçiler islendik çaganyň fiziki işjeňligini, tizligini we çydamlylygyny ýokarlanmaklaryna, beden taýýarlygyny taplamaklaryna, urgy tehnikalaryny özleşdirmeklerine ýardam ederler...

25.07.2025 17:05
18k+

Türkmenistandan Merdan we Şöhrat Toýlyýewler "Ýüpek ýoly - 2025" halkara rallisinde ýeňiş gazandylar

22-nji iýulda Gorno-Altaýsk (RF) şäherinde «Ýüpek ýoly» halkara rallisi tamamlandy. T2 seriýaly off-road ulaglarynyň ýaryşynda umumy hasap boýunça 214 belgide çykyş eden doganlar Merdan we Şöhrat Toýlyýewler ýeňiş gazandylar...

14.07.2025 19:31
17k+

Alp Arslan Begenjow erkin göreş boýunça ýaşlaryň arasynda Aziýanyň çempionatynda bürünç medal aldy

18 ýaşly türkmen pälwany Alp Arslan Begenjow 20 ýaşa çenli türgenleriň arasynda Gyrgyzystanyň Bişkek şäherinde geçirilýän erkin göreş boýunça Aziýanyň ýaşlar çempionatynda 79 kg agram derejede üçünji orny eýeledi...