26-njy iýulda wise-premýer, Türkmenistanyň daşary işler ministri Raşid Meredow Faýzal Muhammad Sabire Owganystanyň Türkmenistanda işler wagtlaýyn ynanylan wekiliniň ygtyýarlandyrylandygyny tassyklaýan resminamasyny gowşurdy.
Türkmenistanyň daşary syýasat edarasynyň Metbugat gullugynyň bellemegine görä, Faýzal Muhammad Sabir eýýäm birnäçe ýyldan bäri Aşgabatda öz ýurduna wekilçilik edýär.
Duşuşygyň barşynda diplomatlar ikitaraplaýyn gatnaşyklaryň dostlukly häsiýetini nygtadylar we bilelikdäki taslamalary durmuşa geçirmek bilen bagly meseleleriň toplumyny ara alyp maslahatlaşdylar.
Türkmenistan-Owganystan-Pakistan-Hindistan (TOPH) transmilli gaz geçirijisiniň, Türkmenistan-Owganystan-Pakistan optiki-süýümli elektrik geçiriji ulgamynyň (TOP), şeýle hem Türkmenistandan Owganystana demir ýollaryň gurluşygynyň taslamalaryna aýratyn üns berildi.
