74 ýaşly amerikan aýdymçysy Brýus Springstin Forbes-iň baha bermegi boýunça baýlygy milliard dollara barabar bolan dördünji sazanda boldy. Neşiriň berýän maglumatlaryna görä, sazandanyň gymmaty 1,1 milliard dollarlyk aktiwleri bar.
Springstiniň baýlygynyň aglaba bölegi - 50 ýyllyk karýerasynda ýazan 300-den gowrak aýdymynyň katalogydyr. 2021-nji ýylda şahyrana tekstli rok aýdymlary bilen tanalýan aýdymçy öz kompozisiýalaryna hukuklaryny öňden gelýän hyzmatdaşy, leýbl Columbia Records-a 500 million dollara satdy. Bu taryhda trek satyn almak boýunça iň uly geleşik boldy.
Şeýle-de, Springstin köp gastrolda bolýar. 2023-nji ýylda 1,6 million bilet satyp, 380 million dollar gazanan The E Street Band topary bilen dünýä syýahatyna ugrady. Şu günki güne çenli toparyň çykyşlarynyň tertibi indiki ýylyň iýulyna çenli düzülen.
Mundan başga-da, Springstin dünýäde albomlarynyň 140 milliondan gowrak nusgasyny satmagy başardy.
Springstin ýigrimi gezek “Gremmi” baýragyny, şeýle-de, “Oskar” baýragyny, iki sany “Altyn globus”-y we ýörite “Toni” baýragyny aldy.
Ondan başga-da, milliarder sazandalaryň sanawynda Jay-Z (2,5 milliard dollar), Rianna (1,4 milliard dollar) we Teýlor Swift (1,3 milliard dollar) bar. Kanýe Uest Adidas bilen 1,5 milliard dollarlyk şertnamasyny ýitirenden soň, sanawdan aýryldy.
