17-nji iýulda Prezident Serdar Berdimuhamedow Birleşen Milletler Guramasynyň Çagalar gaznasynyň (ÝUNISEF) Türkmenistandaky wekilhanasynyň ýolbaşçysy hanym Jalpa Ratnany kabul etdi. Ol döwlet Baştutanymyza ynanç hatyny gowşurdy.
“Biz ýurt meýilnamalaryna esaslanýan köpýyllyk hyzmatdaşlykda çagalaryň we ýaşlaryň abadançylygyna gönükdirilen birnäçe bilelikdäki taslamalary üstünlikli durmuşa geçirdik we geçirýäris.
Häzirki wagtda hyzmatdaşlygymyz 2021-2025-nji ýyllarda ÝUNISEF-iň Türkmenistandaky maksatnamasynyň çäklerinde alnyp barylýar. Şu ýyl ýurdumyzyň ministrlikleri we pudak edaralary bilen 10 sany ýyllyk iş meýilnamasyna gol çekildi. Bu resminamalar, hususan-da, çagalaryň saglygyny goramak, iýmitlenmegi, irki ösüşi, durmuş goraglylygy we inklýuziw bilim almagy babatda hyzmatdaşlygy öz içine alýar diýip, Prezident Serdar Berdimuhamedow belledi.
Söhbetdeşligiň dowamynda Türkmenistanda çagalary goramagyň hukuk binýadynyň hem yzygiderli kämilleşdirilýändigi kanagatlanma bilen bellenildi.
Ýurdumyzda iýmitiň hilini ýokarlandyrmak we çagalaryň irki ösüşini goramak boýunça hem köp işler ýerine ýetirildi.
Söhbetdeşler bilelikdäki işiň häzirki ýagdaýyny we geljekki ugurlaryny ara alyp maslahatlaşmak bilen, çagalara immunizasiýa etmek üçin sanjym serişdelerini we enjamlary satyn almakda ýakyn hyzmatdaşlygy dowam etmegiň möhümdigini aýratyn bellediler.
