Koenigsegg Jesko Absolut awtomobili sagatda tizligini 500 km çenli artdyryp, stend synaglarynda öz güýjüni görkezdi. Bu barada kompaniýanyň esaslandyryjysy Kristian fon Kýonigsegg habar berdi.
Haýran galdyryjy netijä garamazdan, Jesko Absolut heniz hakyky ýolda synagdan geçirilmedi. Onuň sebäbi laýyk şinalaryň gözlegi, şeýle-de tizligi artdyrmak üçin uzyn ýol bölegini tapmak zerurlygy boldy. Kompaniýanyň ýolbaşçysy bu synagyň hem “ýakyn wagtda” bolmagyna umyt bildirýär.
2020-nji ýylyň mart aýynda hödürlenen Jesko Absolut eýýäm birnäçe rekord goýdy, şol sanda tizligi 250 mil/sag we 400 km/sag çenli iň çalt artdyryş boýunça rekordlar bar. Şeýle-de, ol bu tizliklere ýetilenden soň durmak boýunça-da iň tiz önümçilik awtomobilidir.
Koenigsegg Bugatti Chiron Super Sport tarapyndan goýlan 490 km/sag rekorddan geçip, dünýäde iň tiz awtomobil bolmagy maksat edinýär.
