Singapuryň Azyk gullugy (SFA) mör-möjekleriň 16 görnüşini import etmegi we azyklyk hökmünde ulanmagy tassyklandygyny habar berdi. TASS-yň bellemegine görä, tassyklanan görnüşleriň sanawyna çyrlaklar, çekirtgeler, un gurçuklary, ýüpek gurçuklary, bal arylary girýär.
SFA mör-möjekleriň howpsuz we ýokumly belok çeşmesidigini aýdýar. Olaryň sarp edilişini tassyklamak baradaky karara jemgyýetçilik maslahatyndan we töwekgelçilikleriň jikme-jik seljermesinden soň gelindi.
Daşary ýurtlardan getirilýän mör-möjekler adamlar üçin azyk, mallar üçin iým ýa-da azyk senagaty üçin çig mal hökmünde ulanylyp bilner. Şeýle hem, Singapurda inwaziw hasaplanmaýan mör-möjekleriň käbir görnüşlerini ösdürip ýetişdirmäge rugsat berilýär.
Singapur adamlaryň iýmit çeşmesi hökmünde mör-möjekleri ulanmagyny makullan ilkinji ýurt däldir. Şeýlelik bilen, soňky ýyllarda Ýewropa Bileleşigi dört görnüşli mör-möjegi azyk üpjünçiliginde ulanmaga rugsat berdi. Şeýle çäreler Ýeriň köpelýän ilatyny belok bilen üpjün etmäge we oba hojalygynyň daşky gurşawa edýän täsirini azaltmaga mümkinçilik berer diýip garaşylýar.
