Wolgogradda (RF) lukmanlar aorta anewrizmli we böwrek arteriýalary zeperli näsaga armirlenen emeli damarlary oturtmak bilen täsin operasiýany şowly amala aşyrdylar diýip, RBK habar berýär.
Aýal ýarawsyzlygyny meýilnamalaýyn tomografiýa (KT) gözden geçirilişinde tötänden bilip galýar. Lukmanlaryň aýtmagyna görä, keseliň biynjalyk edýän alamatlary ýa-da agyrysy ýok eken, ýöne aorta 8 santimetre çenli giňäpdir. Şeýle ýagdaýdaky hassalaryň her üçünjisi bir ýylyň içinde heläk bolýar.
Näsagyň dowamly keselleriniň bardygy sebäpli ony adaty operasiýa edip bolmansoň, Wolgograd döwlet lukmançylyk uniwersitetiniň (WolgGMU) lukmanlary täze usul ulandylar diýip, uniwersitetiň web sahypasy habar berýär.
Operasiýa wagtynda hirurglar uýluk arteriýasyny deşmek arkaly emeli damarlary ejir çeken ýerlere eltdi. Damar protezleri (stent graflary) biri-birine birikdirilip, göni operasiýa otagynda gurluş üýtgeşmeleri girizildi.
“Bu üýtgeşik tejribe diňe bir Wolgograd üçin däl, eýsem tutuş Günorta Federal okrug üçin ajaýyp tejribe. Agyr keselleri şunuň ýaly usul bilen bejermek näsag üçin töwekgelçiligi aňrybaş azaldýar" diýip, Wolgograd döwlet lukmançylyk uniwersitetinde bellediler.
Bu amalyň netijesinde böwrek arteriýalaryndan ganyň aýlanyşyny saklap galmak we adaty stent-grafty goýmak prosedurasyny ýerine ýetirmek mümkin boldy.
Näsag eýýäm keselhanadan çykaryldy.
