Gazagystanyň paýtagty Astana şäherinde geçirilýän Şanhaý Hyzmatdaşlyk Guramasynyň ýokary derejeli sammitiniň çäklerinde «ŞHG+» formatyndaky duşuşyk guraldy. Oňa türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem gatnaşdy.
Gazagystanyň Garaşsyzlyk köşgünde türkmen halkynyň Milli Liderini Gazagystanyň Prezidenti Kasym-Žomart Tokaýew garşylady.
Soňra Gurbanguly Berdimuhamedow sammite gatnaşmak üçin gelen beýleki döwletleriň döwlet we hökümet Baştutanlary bilen bilelikdäki surata düşmek dabarasyna gatnaşdy.
Gazagystanyň Prezidentiniň başlyklyk etmeginde geçirilýän «ŞHG+» formatyndaky duşuşygyna Türkiýe Respublikasynyň Prezidenti Rejep Taýyp Ärdogan, Russiýanyň Prezidenti Wladimir Putin Hytaýyň Başlygy Si Szinpin, Özbegistanyň Prezidenti Şawkat Mirziýoýew, Gyrgyzystanyň Prezidenti Sadyr Žaparow, Täjigistanyň Prezidenti Emomali Rahmon, Eýranyň Prezidentiniň wezipesine wagtlaýyn ýerine ýetiriji Mohammad Mohber, Mongoliýanyň Prezidenti Uhnaagin Hurelsuh, Pakistanyň Premýer-ministri Şahbaz Şerif, Belarusyň Prezidenti Aleksandr Lukaşenko, Kataryň Emir Şeýh Tamim bin Hamad Al Tani, BAe-niň Ras el-Haým Emirliginiň emiri Saud bin Sakar al-Kasimi, Hindistanyň daşary işler ministri Subrahmanýam Jaýşankar, BMG-niň Baş sekretary Antoniu Guterriş we beýleki iri halkara guramalaryň ýolbaşçylary gatnaşdy.
Türkmenistanyň Halk Maslahatynyň Başlygy Gurbanguly Berdimuhamedow bu sammite gatnaşmazdan ozal, Magtymguly Pyragynyň Astanadaky ýadygärliginiň açylyş dabarasyna gatnaşdy.
