Wengriýa Ýewropa Bileleşiginiň Geňeşinde ýarym ýyl möhlet bilen başlyklyk etmäge başlaýar. Ol 1-nji iýulda ÝB-de estafetany Belgiýadan kabul etdi, dekabr aýynyň ahyrynda bolsa başlyklyk etmek nobatyny Polşa geçirer. Bu barada TASS habar berýär.
Başlyklygyň resmi logotipi Rubigiň kubigi görnüşinde bolup, onuň bir tarapynda Wengriýanyň gyzyl-ak-ýaşyl baýdagy, beýleki bir tarapynda aýlaw boýunça ýerleşdirilen Ýewropa Bileleşiginiň ýyldyzlar görnüşindäki nyşany şekillendirilen. Logotip hökmünde bu kubigiň saýlanmagy tötänleýin däl: şu ýyl wengriýaly inžener Ernýo Rubigiň oýlap tapan “tapmaçasyna” 50 ýyl doldy.
Başlyklygyň saýtynda bellenilişi ýaly, bu tapmaça “Wengriýanyň ÝB Geňeşinde üstünlikli başlyklyk etmegi üçin strategiki görüş, sabyrlylyk, tertip-düzgün we takyklyk ýaly zerur bolan häsiýetleri” aňladýar.
Wengriýa birnäçe meseleler boýunça ÝB-niň ýolbaşçylary bilen düýpli düşünişmezlikleriň bar şertlerinde wezipä girişýär. Ol başlyklyk edýän döwründe Ýewropa syýasatynyň esasy meseleleri boýunça ylalaşyk tapmak ýaly birnäçe kynçylyklar bilen ýüzbe-ýüz bolar.
