25-nji iýunda Türkmenistanyň Döwlet daşary ykdysady iş bankynyň başlygy Rahymberdi Jepbarowyň ýolbaşçylygyndaky türkmen wekiliýeti Nebiti eksport ediji döwletleriň guramasynyň (OPEK) Halkara ösüş Gaznasy tarapyndan guralan üçünji her ýylky ösüş forumyna gatnaşdy. Bu barada Türkmenistanyň DIM-niň Metbugat gullugynda habar berildi.
Forumyň barşynda Jepbarow OPEK Gaznasynyň prezidenti Abdulhamid Alhalifoý bilen gepleşikleri geçirdi. Taraplar Türkmenistan bilen Gaznanyň arasynda köp ýyllyk hyzmatdaşlygy mundan beýläk hem ösdürmegiň meselelerini maslahatlaşdylar.
Gepleşikleriň jemleri boýunça Türkmenistanyň Hökümeti bilen OPEK Gaznasynyň arasynda 2024-2029-njy ýyllarda "Çarçuwalaýyn hyzmatdaşlyk maksatnamasyna" gol çekildi.
Bu maksatnama köpugurly ösüş maliýe institutlary bilen, şol sanda OPEK-iň Halkara ösüş gaznasy bilen ikitaraplaýyn hyzmatdaşlygy giňeltmäge gönükdirilendir.
