Toyota Tesla-nyň ABŞ-daky we bütin dünýädäki çemeleşmesine eýerip, Ýaponiýada ähli elektromobiller üçin Lexus brendiniň zarýad beriş stansiýalaryny açjakdygyny mälim etdi.
Geçen ýylyň iýun aýynda Lexus Tokioda ilkinji çalt zarýad beriş stansiýasyny açdy. 2023-nji ýylyň dekabr aýynda Karuizawanyň çäginde ýerleşen ikinji zarýad stansiýasy resmi taýdan ulanylyşa girizildi. Bu zarýad beriş stansiýalary 150 kWt çenli kuwwatly çalt zarýad beriji gurluşlar bilen enjamlaşdyrylandyr.
Öň, Lexus-yň zarýad beriş stansiýalary diňe Lexus-yň eýeleri üçin elýeterlidi. Awtoulag eýeleri My Lexus programmasy arkaly 60 gün öňünden zarýad beriş ýerini ätiýaçlandyryp, programma arkaly awtomatiki töläp bilýärler. Mundan başga-da, Lexus mugt içgiler, iş ýerleri we hyzmatlar üçin arzanladyş ýaly goşmaça hyzmatlary-da hödürleýär. Indi bu zarýad beriş stansiýalary ähli elektromobil eýeleri üçin elýeterlidir.
Ford Tesla-nyň zarýad beriş stansiýalaryny ulanmak meýilnamalaryny yglan eden ilkinji kompaniýa bolupdy. Soň bu göreldä awtoöndürijileriň ählisi diýen ýaly, şol sanda Toyota we Lexus hem eýerdi.
Belläp geçsek, Tesla-nyň eýýäm ABŞ-da we Kanadada 15 000-den gowrak we tutuş dünýäde 50 000-den gowrak stansiýasy bar. Deňeşdirmek üçin, Lexus 2030-njy ýyla çenli Ýaponiýada 100 töweregi zarýad beriş stansiýasyny gurmagy meýilleşdirýär.
