Germaniýada futbol boýunça Ýewropa çempionatynyň E we F toparlarynyň arasynda ikinji tapgyr duşuşyklar geçirildi.
Gruziýanyň milli ýygyndysy Çehiýa bilen 1:1 deňme-deň oýnady. Gamburgda geçen oýun ahyryna çenli dartgynly boldy. Gruziýa birinji ýaryma goşulan goşmaça wagtda 11 metrlik jerime urgusy bilen hasaby açdy. Žorž Mikautadze urgyny dürs ýerine ýetirdi. Çehiýa 59-njy minutda Patrik Şikiň goly bilen hasaby deňledi.
Gruziýanyň derwezebany Georgiý Mamardaşwili duşuşykda 11 gezek seýw etdi (derwezäni goldan gorady). Bu Ýewro-2012-den bäri iň gowy görkezijidir. Şol Ýewroda irlandiýaly derwezeban Şeý Giwen ispaniýalylar bilen oýunça 11 gezek seýw edipdi. Bu babatda rekord Latwiýanyň derwezebany Aleksandr Kolinko degişlidir. Ol 2004-nji ýylda Niderlandlar bilen oýunda 12 gezek derwezesini gorady.
F topardan beýleki jübütleriň oýny Dortmunda geçirildi. Portugaliýa Türkiýäni 3:0 hasap bilen ýeňdi we pleý-off tapgyryna çykdy. Gollary 21-nji minutda Bernardu Silwa, 29-njy minutda Samet Akaýdyň (öz derwezesine), 56-njy minutda bolsa Brunu Fernandeş (Ronaldunyň pasy bilen) geçirdi.
Iki tapgyrdan soň, Portugaliýa 6 utuk bilen birinji orny eýeleýär, Türkiýede 3 utuk bar (ikinji ýer), Çehiýada we Gruziýada 1 utukdan bar.
Jemleýji tapgyrda 26-njy iýunda portugaliýalylar gruzinler bilen, türkler bolsa çehler bilen duşuşar.
E toparda Belgiýa 2:0 hasap bilen Rumyniýadan üstün çykdy. Duşuşykda gollary Ýuri Tilemans (2-nji minut) we Kewin De Bruýne (80) geçirdi.
Lukaku 64-nji minutda gol geçirdi, emma VAR oýundan daşardaky ýagdaýy hasaba aldy. Bu gol Lukaku üçin Ýewro-2024-de eýýäm ýatyrylan üçünji goly boldy.
E toparda ýygyndylaryň ählisiniň hem 3 utugy bar. Goşmaça görkezijileri boýunça Rumyniýa birinji, Belgiýa ikinji, Slowakiýa üçünji, Ukraina dördünji ýerleşýär.
Jemleýji tapgyrda 26-njy iýunda rumynlar slowaklar bilen, belgiýalylar bolsa ukrainalylar bilen duşuşar.
