Italiýanyň Ferrari kompaniýasynyň ilkinji elektrik awtoulagynyň bahasy 500 000 dollardan gowrak bolar. Bu barada ýagdaýa ýakyn çeşmelere salgylanýan Reuters habar berdi.
Bahasy, ulaga goşuljak aýratyn sazlamalara we enjamlara baglylykda, 15-20% gymmat bolup bilner. Ilkinji modeli 2025-nji ýylyň ahyrynda çykarmak meýilleşdirilýär.
Bu çäräniň öňüsyrasynda Ferrari Italiýanyň demirgazygyndaky Maranello şäherinde elektrik ulag öndürýän täze zawody işe girizmäge taýýarlanýar. Zawody indiki hepdäniň başynda açmak meýilleşdirilýär.
Çeşmeler täze zawodyň, Ferrari-niň elektromobillerini hem goşmak bilen, awtoulag önümçiligini häzirki 14 000-liginden 20 000-e çenli artdyrmagyna mümkinçilik berjekdigini çaklaýar.
Şonuň bilen birlikde, Tesla-nyň baş direktory Ilon Mask çykdajylary optimallaşdyrmagyň we elýeterli elektrik ulaglarynyň önümçiligini çaltlaşdyrmagyň ýoluny gözleýär, Ford hem şol maksat bilen tejribeli inženerleri işe alýar we Hyundai 20 000 dollarlyk Inster-i bazara hödürläp, ony “innowasiýa” aýratynlykly we “täzeden göz öňünde tutulan” ülňüdäki elýeterli elektrik awtoulagynyň ornunda goýýar.
