Nury Halmämmedow adyndaky “Dutaryň sesi” atly Moskwa halkara sungat festiwaly geçmişiň meşhur türkmen aýdymçylarynyň hormatyna birnäçe ýörite baýraklary döretdi. Bu barada festiwalyň art-direktory, pianinoçy Mamed Guseýnow aýtdy.
Döredilen baýraklaryň arasynda “Nury Halmämmedowyň wokal eserleriniň iň gowy ýerine ýetirilişi üçin” Medeniýet (Maýa) Şahberdiýewa adyndaky baýrak, “Etno-medeni däp-dessurlara esaslanan kamera eseriniň iň gowy ýerine ýetirilişi üçin” Maýa (Mamajan) Kulyýewa adyndaky baýrak bar. Baýraklar ýaş ýerine ýetirijileri döredijilik işine höweslendirmäge gönükdirilen bolup, her ýyl berler.
Baýraga dalaşgärler festiwalyň çäklerinde “Wokal sungaty” nominasiýasynda geçirilýän bäsleşigiň laureatlarynyň arasyndan saýlanar. Birinji sylaglama dabarasy 2024-nji ýylda “Dutaryň sesi” festiwalynyň Gala-konsertinde geçiriler.
Nury Halmämmedow adyndaky “Dutaryň sesi” atly VIII Moskwa halkara sungat festiwalynyň çäklerinde etno-medeni däp-dessurlara esaslanan akademiki aýdym-sazyň iň gowy ýerine ýetirilişi boýunça sazandalar bäsleşigine arzalar 2024-nji ýylyň 1-nji oktýabryna çenli kabul edilýär.
