Gruziýanyň Milli banky Gruziýanyň milli futbol ýygyndysynyň 2024-nji ýylyň Ýewropa çempionatyna gatnaşmagy mynasybetli ýörite şaýy pullaryň çykaryljakdygyny mälim etdi. Bäş lari bahaly şaýylar altyndan we kümüşden taýýarlanar diýip, TASS habar berýär.
Şaýylaryň dizaýny Gruziýanyň Futbol federasiýasy bilen bilelikde işlenip taýýarlandy. Teňňäniň bir tarapynda gowşaklygy ýeňip geçmegiň nyşany bolan aždarha bilen söweşýän atlyny öz içine alýan milli ýygyndynyň logotipi şekillendirilen, şeýle-de “Men – Gruziýa” diýen ýazgy bar.
Şaýynyň beýleki bir tarapynda Gruziýanyň milli ýygyndysynyň köýnekçesiniň dizaýny hödürlenýär. Gruzin we iňlis dillerindäki ýazgylar nominaly we çykyş senesini görkezýär.
Şaýylar Litwanyň zikgehanasynda çykarylar we ýylyň ahyryna çenli satuwa çykar.
Ýatlap geçsek, Gruziýanyň milli ýygyndysy Ýewropa çempionatyna ilkinji gezek gatnaşýar. Topar “F” toparçasynda Türkiýä, Portugaliýa we Çehiýa garşy oýnar.
