Kazan Federal uniwersitetiniň alymlary oba-hojalyk ekinleriniň hasyllylygyny ýokarlandyryp biljek bakteriýalaryň ştammyny tapdylar. Gürrüň toprak aktinobakteriýalaryna degişli Nocardia mangyaensis NH1 hakynda barýar diýip, Mail.ru ýazýar.
Toprakda bioelýeterli demriň ýoklugy ösümlikler üçin çynlakaý mesele bolup durýar. Demir ýetmezçiligi ýokary çyglylyk, käbir dökünleriň zyýanly täsirleri we topragyň pH balansynyň pes bolmagy ýaly dürli faktorlar sebäpli döräp biler. Demriň ýetmezçiligi ýaş ýapraklaryň saralmagyna we guramagyna getirýär, bu bolsa öz gezeginde ösümligiň ösmegine päsgel berýär we hasyllylygy peseldýär.
Emma Nocardia mangyaensis NH1-iň özboluşly bir aýratynlygy bar: bakteriýalar daşky gurşawdan demir ionlarynyň ýygnanmagyna we ösümliklere geçirilmegine mümkinçilik berýän sideroforlary, molekulalary öndürýär. Bu demir ýetmezçiliginiň öňüni almaga kömek edýär we netijede ösümlikleriň ösmegine itergi berýär, öndürijiligi ýokarlandyrýar.
Gözlegler Nocardia mangyaensis NH1 ştammyna esaslanýan dökünleriň diňe bir hasyllylygy ýokarlandyrmak bilen çäklenmän, ösümlikleri kesellerden we stres faktorlaryndan hem gorap biljekdigini görkezdi.
