ABŞ-nyň Prezidenti Donald Tramp 2026-njy ýylyň futbol boýunça dünýä çempionatynyň bije çekişiginiň 5-nji dekabrda Waşingtonyň Kennedi adyndaky Ýerine ýetiriş sungat merkezinde geçiriljekdigini habar berdi. Ol muny FIFA-nyň prezidenti Janni Infantinonyň gatnaşmagynda Prezidentiň iş otagyndan ýörite ýüzlenme bilen aýtdy.
Tramp amerikan paýtagty üçin bu çäräniň geçirilmeginiň möhüm wakadygyny belledi.
“Biziň üçin bu dünýä derejesindäki wakany getirmek we bu ýerde, paýtagtymyzyň medeni merkezinde ajaýyp adamlary we ajaýyp türgenleri, dünýäniň iň gowy türgenlerini ýygnamak uly mertebe” – diýip, Ak tamyň ýolbaşçysy aýtdy.
2026-njy ýylyň futbol boýunça dünýä çempionaty ABŞ-nyň, Kanadanyň we Meksikanyň 16 şäherinde geçiriler. Oňa 48 milli ýygyndy gatnaşar we olar jemi 104 oýun oýnar. Toparlar her biri dört topardan 12 toparça bölner. Pleý-offa her toparçadan ilkinji iki orny eýelän ýygyndylar we üçünji orunlary eýelän iň gowy sekiz topar çykar. Ýaryşda ilkinji gezek täze tapgyr – 1/16 final bolar.
