Halkara tebigaty goramak birleşigi (IUCN) žiraflary resmi taýdan dört görnüşe böldi. Ozal olaryň hemmesi bir görnüş diýlip hasaplanýardy diýip, Bi-bi-si belleýär.
Indi ylym şu aşakdakylary tapawutlandyrýar:
- Demirgazyk žiraf (günbatar afrikan, kordofan we nubiýa görnüşleri bilen),
- Gözenekli žiraf,
- Masaý žirafy (masaý görnüşi we Tornikroft žirafy bilen),
- Günorta žiraf (günorta afrikan we angola görnüşleri bilen).
Soňky ýyllarda alymlar bu haýwanlaryň biri-birinden ep-esli tapawutlanýandygyna üns berdi. Bu hem toparlara bölünişe gaýtadan seretmek üçin esas boldy.
Hünärmenleriň pikiriçe, täzelenen çemeleşme žiraflara abanýan howplara has takyk baha bermäge we Afrikanyň dürli ýerlerinde olary goramak boýunça çäreleri işläp düzmäge kömek eder. Bu çözgüt milli we halkara derejesinde tebigaty goraýyş syýasatyna hem täsir eder.
Halkara tebigaty goramak birleşigi dünýäde iň uly ekologiýa ulgamydyr. Ol 1400-den gowrak guramany we 17 müň hünärmeni birleşdirýär. Birleşik 1948-nji ýylda döredildi we howp abanýan görnüşleriň Gyzyl sanawyny ýöredýär. Gurama biodürlüligi saklamak meselelerinde esasy we ygtybarly çeşme hasaplanýar.
