Glosterşir graflygyndan britaniýaly bagban Grem Barratt şu tomus birbada dört rekord goýup, Ginnesiň rekordlar kitabyna girdi.
Ol birinji rekordy 2-nji iýunda goýdy: Barratt 18 santimetr uzynlykda nohut kösügini ösdürip ýetişdirdi. Bu onuň adaty ululygyndan iki esse diýen ýalydyr. Täze rekord 1970-nji ýyllarda Jon Innes merkezinde ösdürilen “JI2144” görnüşiniň tohumynyň esasynda goýuldy.
11-nji iýulda bagban dünýäde iň agyr meksikan pomidoryny (tomatilo) ösdürdi. Onuň agramy 140 gram boldy – 2024-nji ýyldaky rekorddan üçden bir köp.
Grem möwsümi 28-nji iýulda hasaba alnan rekordy bilen jemledi. Ol iň uzyn – 1,3 metr we iň agyr – 2,8 kilogram lýuffa miwelerini ösdürip ýetişdirdi.
Lýuffa kädini we kabaçogy öz içine alýan kädiler maşgalasyna degişlidir. Bu üýtgeşik miwe tropiki sebitlerde lianalarda ösýär we Günorta Aziýada has meşhurdyr. Ýaş miweler iýmek üçin ýaramly, ýöne bişdigiçe olar aşhana tagamlary üçin gaty we has süýümli bolýar. Guradylan, öýjükli we ýumşak miweler gap-gaçlary ýuwmak üçin tebigy gubka hökmünde hem ulanylýar.
“Men her ýyl täze bir zady ösdürmäge çalyşýaryn we futbol menejeri ýaly iň gowy oýunçylaryma bil baglaýaryn. Käbir gök önümler ösdürip ýetişdirmek üçin kyn boldy, şonuň üçin men olary sanawymdan aýyrdym. Käbirleri meni haýran galdyrdy we indi olary ösdürmek isleýärin. Şol bir wagtyň özünde üstünlik maňa öňe gitmäge we beýleki görnüşlere-de ünsi jemlemäge mümkinçilik berýär” – diýip, rekord eýesi belleýär.
2024-nji ýylda bagban iň agyr seldereý boýunça rekordy saklapdy, ýöne tiz wagtdan bu üstünligi garşydaşyna berdi. Ol täze rekordlary özboluşly rewanş hasaplaýar.
