Kanadaly alymlar bary-ýogy bir hepdäniň dowamynda sosial ulgamlary ulanmagy (Facebook, Instagram, Twitter, TikTok...) çäklendirmegiň aýal-gyzlaryň, aýratynam, horlugy gözelligiň nusgasy hökmünde görýänleriň özüne bolan ynamynyň ýokarlanmagyna getirip biljekdigini anykladylar. Bu barada Medical Xpress neşirindäki makala salgylanyp, MIR24 habar berýär.
Ýork uniwersitetiniň 66 gyz talyby bilen geçirilen ylmy barlaga gatnaşyjylaryň ýarysy ýedi günüň dowamynda sosial ulgamlara girmedi, galan ýarysy bolsa olary hemişekisi ýaly ulanmagyny dowam etdirdi.
Tejribeden öň we soň geçirilen pikir soraşmalaryň netijesine görä, sosial ulgamlarda “arakesme alan” gyzlar öz daşky keşplerine we özlerini başgalaryň gözi bilen görüşlerine has gowy baha berip başladylar.
Mundan başga-da, sosial ulgamlardan ýüz öwren gatnaşyjylar sagdyn durmuş ýörelgesini endik edindiler: dostlary bilen ýygy-ýygydan duşuşdylar, gezelenç etdiler we sport bilen meşgullandylar.
Gözlegçiler bu üýtgeşmeleri sosial ulgamlarda aýal-gyzlaryň özlerine berýän bahasyna ýaramaz täsir edip biljek “ideal” keşp baradaky maglumatlaryň täsirine sezewar bolýandyklary bilen düşündirýärler. Sosial ulgamlardan wagtlaýyn ýüz öwürmek bolsa, olara bu maglumat akymyndan daşlaşmaga we özlerine hem hakyky üstünliklerine ünsi jemlemäge mümkinçilik berýär.
Gözlegiň awtorlarynyň biri, psihologiýa professory Jennifer Millsiň belleýşi ýaly, öň aýal-gyzlar moda we gözellik baradaky maglumatlary aýda bir gezek çykýan žurnaldan alýardylar. Häzir bolsa sosial ulgamlarda baglylygy döredip, özüňe bolan ynamy gaçyrýan şeýle mazmun gije-gündiziň dowamynda elýeterlidir.
