Russiýaly alymlar “elektron gözleri” döretmegiň üstünde işleýärler, olaryň kömegi bilen görşüni ýitiren adamlar obýektleriň suduryny saýgaryp bilerler. Tehnologiýa iki kameradan, beýnä ýerleşdirilen çipden we daşarky halkadan ybarat ulgam.
Enjam obýektleriň sudurlaryny saýgarmaga, adamlary kesgitlemäge, giňişlikde ýöremäge we ugur tapmaga mümkinçilik berer. Şeýle-de bolsa, okamak we ýokary takyklygy talap edýän beýleki wezipeleri ýerine ýetirmek üçin emeli aňyň kömegi gerek bolar.
Işläp düzüjiler entek işläp üstüni ýetirmeli zadyň köpdügini bellediler. Enjamy ulanmak üçin oňaýly, suw geçirmez ýaly etmek zerur.
Tehnologiýa eýýäm haýwanlarda synagdan geçirildi, ýöne lukmançylyk ygtyýarnamasyny almak üçin azyndan birnäçe ýyl gerek bolar. Mundan başga-da, onuň bahasy ilkibadalar gymmat bolar. Şeýle-de bolsa, işläp düzüjiler enjam köpçülikleýin öndürilip başlansa, hemmeler üçin elýeterli bolar diýip umyt edýärler.
Eger primatlarda gaýtadan geçiriljek synag enjamyň netijelidigini tassyklasa, soňraky synaglar üçin adamlaryň fokus topary jemlener. Döredijiler görşüni ýitiren we synaga gatnaşmak isleýän adamlardan eýýäm ýeterlik mukdarda arzalary aldylar.
Şuňa meňzeş işläp taýýarlamalaryň üstünde beýleki ýurtlarda-da işlenýär. Şeýlelik bilen, Ilon Maskyň Neuralink kompaniýasy dogabitdi körlere-de birnäçe ýylyň içinde görşüni dikeltmegi wada berýär. Çipler kör maýmynlarda eýýäm üstünlikli synag edildi, olaryň hiç biri-de aradan çykmady ýa-da enjam sebäpli agyr şikes almady. Durulygyň ilki pes boljakdygy, ýöne ahyrky netijede, hatda adaty görüşden hem ýiti bolup biljekdigi bellendi.
