Bazara ilkinji iPad planşetiniň çykan wagtyndan bäri 14 ýyl geçdi. Gurluşyň anonsy 2010-njy ýylyň 20-nji ýanwarynda boldy, ABŞ-da satuwlar bolsa şol ýylyň 3-nji aprelinde başlandy. Bu barada ixbt.com habar berýär.
Planşetler iPad-den öň hem bardy, ýöne olar uly, oňaýsyz we barmak bilen dolandyrmak üçin amatly däldi. Apple bolsa düşnükli interfeýsli inçe, ýeňil planşeti hödürledi, bu hem täze bazaryň döremegine sebäp boldy.
Ilkinji 80 günde Apple 3 mln gurluş satdy, iPad 2-niň çykan wagtyna çenli satuwlar 15 mln planşetden geçdi.
Häzirki günde Apple planşet bazarynda gürrüňsiz öňdebaryjy bolmagyny dowam edýär. 2023-nji ýylyň jemi boýunça kompaniýa bazaryň 40,6%-ini eýeläp, ýakyn bäsdeşi Samsung-dan iki esse diýen ýaly öňe geçdi.
iPad-yň üstünligi innowasion dizaýn, ykjam interfeýs, şeýle-de programmalaryň giň toplumy ýaly birnäçe faktorlar bilen baglanyşyklydyr – Apple App Store ýörite iPad üçin işlenip taýýarlanan köp sanly programmamy hödürleýär. Şeýle-de, planşet güýçli ekoulgamy bilen tapawutlanýar, iPad beýleki Apple gurluşlary bilen birleşýär, bu hem ony işlemek we döredijilik üçin amatly edýär.
14 ýylyň içinde iPad uzak ýol geçdi. Häzir iPad-yň islendik islege we baha görä modelleri köp. Gurluş iş, okuw, güýmenje we döredijilik üçin ulanylýar.
