3-5-nji aprelde Türkmenistanyň Söwda-senagat edarasynyň binasynda ýurdumyzyň söwda toplumynyň sergisini geçirmek meýilleşdirilýär.
Anna güni geçirilen Hökümet mejlisiniň barşynda wise-premýer B.Atdaýew sergä taýýarlyk görmek boýunça alnyp barylýan işler barada hasabat berdi.
Bellenilişi ýaly, gözden geçirilişe söwda toplumyna degişli ministrlikleriň, pudaklaýyn düzümleriň köp sanlysynyň, Senagatçylar we telekeçiler birleşmesiniň dürli ulgamlarda işleýän agzalarynyň 210-dan gowragynyň gatnaşmagyna garaşylýar.
Sergi ýurdumyzyň söwda we hyzmatlar ulgamynda, dokma, halyçylyk pudaklarynda, beýleki ugurlarda gazanýan üstünliklerini görkezer. Onuň çäklerinde Dokma senagaty ministrliginiň garamagyndaky hem-de Senagatçylar we telekeçiler birleşmesiniň agzalaryna degişli modeller öýleriniň milli lybaslarynyň dabaraly görkezilişini, söwda toplumyna degişli kärhanalaryň täze önümleriniň mahabat-tanyşdyryş çärelerini guramak meýilleşdirilýär.
